گوادر اور کراچی کو مزار شریف کے راستے تاشقند سے ملانا چاہتے ہیں، فواد چودھری
Written by Prime FM92 on September 16, 2021
وزیر اطلاعات فواد چوہدری کا کہنا ہے کہ پاکستان سی پیک کو سینٹرل ایشیا سے جوڑنا چاہتا ہے، ہم گوادر اور کراچی کو مزار شریف کے راستے تاشقند سے ملانا چاہتے ہیں۔
فواد چوہدری نے کہا کہ ہم چاہتے ہیں تاشقند سے سی پیک روٹ دوشنبے اور قازقستان تک جائے، ساری وسط ایشیائی ریاستیں ٹرین اور سڑک سے لنک ہوجاتی ہیں، ٹرین سے وسط ایشیاء جڑ جائے تو سارا منظر نامہ بدل سکتا ہے۔
فواد چوہدری نے کہا کہ وزیراعظم نے قازقستان کے صدر سے افغانستان کی صورت حال پر بات کی، وزیراعظم نے کہا افغانستان اب استحکام کی طرف جائے گا یا افراتفری کی طرف۔
وزیر اطلاعات کے مطابق وزیراعظم نے کہا ہے دنیا افغانستان کی نئی حقیقت تسلیم کرلے تو دنیا کو فائدہ ہوگا، وزیراعظم نے کہا دنیا نے افغانستان کو افراتفری میں چھوڑ دیا تو بڑا مسئلہ جنم لے گا۔