عامر لیاقت کا پوسٹ مارٹم نہیں کرایا جائے گا، پولیس اور ورثاء میں مذاکرات کامیاب

 گزشتہ روز انتقال کر جانے والے پی ٹی آئی کے رکن قومی اسمبلی اور ٹی وی میزبان عامر لیاقت کے پوسٹمارٹم  سے متعلق پولیس اور ورثاء میں  معاملات طے پا گئے جس کے بعد اب عامر لیاقت حسین کا پوسٹمارٹم نہیں کرایا جائے گا۔

نجی ٹی وی  نیوز کے مطابق   پولیس اور  عامر لیاقت کے اہلخانہ کے درمیان معاہدہ طے پایا کہ اہلخانہ بیان حلفی لکھ کر دیں کہ وہ میت کا پوسٹمارٹم نہیں کرانا چاہتے ۔

خیال رہے کہ  اس سے قبل  پولیس نے عامر لیاقت کی میت ورثا کے حوالے کرنے سے منع کر دیا تھا ،پولیس نے چھیپا ویلفیئر کو خط لکھا تھا  کہ عامر لیاقت کی میت کسی کے حوالے نہ کی جائے۔

نجی ٹی وی اے آر وائی نیوز کے مطابق پولیس نے سرد خانہ چھیپاکے انچارج کو خط لکھا تھا کہ ڈاکٹر عامر لیاقت کی میت امانت کے طور پر آپ کے سرد خانے کے سپردکی گئی ہے۔لاش بریگیڈ تھانے کاعملہ وصول کرے گا، کسی اور کے حوالے نہ کی جائے،اگر لاش ورثاءکے حوالے کی گئی تو قانونی کارروائی کی جائیگی۔