عمران خان کو کراچی لے جانیوالا طیارہ واپسی پر فنی خرابی کا شکار،سابق وزیراعظم متبادل طیارے سے واپس پہنچے

سابق وزیرِ اعظم عمران خان کو کراچی لانے والا نجی کمپنی کا طیارہ کراچی پہنچ کر فنی خرابی کا شکار ہوگیا تھا جس کے بعد عمران خان متبادل طیارے سے آج صبح اسلام آباد پہنچے۔سابق وزیرِ اعظم عمران خان ہفتے کی شب ساڑھے 8 بجے پاکستانی بزنس گروپ ’اینگرو‘ کی ملکیت AP-PLE رجسٹریشن کے حامل طیارے میں اسلام آباد سے کراچی پہنچے تھے۔

ایوی ایشن ذرائع کے مطابق کراچی پہنچنے کے بعد طیارے میں فنی خرابی پیدا ہو گئی۔سابق وزیرِاعظم عمران خان نے مزارِ قائد سے متصل باغِ جناح میں پاکستان تحریکِ انصاف کے زیرِ اہتمام ایک بڑے جلسے سے خطاب کیا۔جلسے کے بعد انہوں نے پارٹی رہنماؤں سے ملاقاتیں کیں، وہ گورنر سندھ عمران اسماعیل کی ذاتی رہائش گاہ بھی گئے۔اس دوران عمران خان کو کراچی سے اسلام آباد پہنچانے کے لیے دوسرے چارٹرڈ طیارے کا بندوبست کیا گیا۔

روزنامہ جنگ کے مطابق  عمران خان صبح 3 بجے کراچی ایئر پورٹ کے ٹرمینل ون پر پہنچے۔گورنر سندھ عمران اسماعیل اور پارٹی کی دیگر قیادت نے عمران خان کو رخصت کیا۔عمران خان ایئر کرافٹ سیلز اینڈ سروسز (پرائیویٹ) لمیٹڈ (ASSL) کے چارٹرڈ طیارے سے آج صبح ساڑھے 5 بجے اسلام آباد پہنچے۔