سندھ کےبعدپنجاب میں بھی پانی کی کمی ،خان پور ڈیم میں پانی کی سطح انتہائی کم رہ گئی

اسلام آباد اور راولپنڈی کو پانی فراہم کرنے والے ڈیم خان پور میں پانی کی سطح خطرناک حد تک کم ہوگئی ہے جس کے بعد سپلائی معطل ہونے کا خدشہ ہے۔

نجی ٹی وی نیوز کے مطابق خان پور ڈیم میں پانی کی انتہائی سطح ایک ہزار 910فٹ رہ گئی  ہے ،ماہرین کے مطابق خان پور ڈیم سے راولپنڈی اور اسلام آباد کو پینے کے پانی کی سپلائی معطل ہونے کا خدشہ ہے۔خان پور ڈیم میں پانی کی آمد 194 کیوسک اور اخراج 121 کیوسک ہے۔خان پور ڈیم سے راولپنڈی اسلام آباد کوروزانہ 100 کیوسک پانی فراہم کیا جاتا ہے۔

واضح رہے کہ بارشوں میں کمی  کے باعث ملک بھر میں  پانی کی کمی کا سامنا ہے،محکمہ موسمیات کے مطابق مارچ اور اپریل میں بارشوں کی اوسط تاریخی طور پر کم رہی ہے۔

ارسا کے مطابق مئی کے اوائل میں  ملک بھر میں پانی کے ذرائع دریاؤں اورڈیموں میں اوسط توقع سے مجموعی قلت 38 فیصد  تھی۔

 دریائے سندھ اور تربیلا ڈیم میں 13 فیصد، دریائے کابل میں 46 فیصد، دریائے جہلم اور منگلا ڈیم میں 44 فیصد، دریائے چناب میں 48 فیصد اور دیگر ذرائع میں یہ کمی 66 فیصد  ریکارڈ کی گئی۔