لاہور میں ہفتے کو سرکاری چھٹی کا اعلان کردیا گیا

حضرت داتا علی ہجویریؒ کے 979ویں عرس کی 3روزہ تقریبات کا آج سے آغازہو گیا ہے،لاہور میں ہفتے (17ستمبر)کو سرکاری چھٹی کا اعلان کیا گیا ہے ۔

تفصیلات کے مطابق حضرت داتا گنج بخشؒ کے عرس کی تقریبات 15 تا 17 ستمبر  تک جاری رہیں گی۔ حضرت داتا گنج بخش  علی ہجویریؒ تقریباً 1 ہزار سال قبل افغانستان سے لاہور تشریف لائے اور بھا ٹی دروازے کے قریب قیام فرمایا،انہوں نے  اپنے اخلاق اور حُسنِ کردار سے غیر مسلموں کو گرویدۂ اسلام کیا، ان کی بے مثل تصنیف کشف المحجوب تصوف پر سند قرار دی جاتی ہے۔

 سی سی پی او لاہور غلام محمود ڈوگر کے مطابق لاہور پولیس کے سیکیورٹی انتظامات مکمل ہیں، ملک بھر سے آنیوالے زائرین اورعقیدت مندوں کو فول پروف سیکیورٹی فراہم کی جا رہی ہے، 3 ہزار سے زائد پولیس افسران اور جوان سیکیورٹی کے فرائض سر انجام دے رہے ہیں، 4 ایس پیز، 7 ڈی ایس پیز، 46 ایس ایچ اوز، 261 اَپر سب آرڈینیٹس اور 93 لیڈیز پولیس اہلکار تعینات ہیں۔

 زائرین کو 3 درجاتی چیکنگ میکانزم سے مکمل تلاشی کے بعد ہی احاطہ مزار میں داخلے کی اجازت دی جا رہی ہے، چیکنگ کیلئے واک تھرو گیٹس، میٹل ڈیٹیکٹرز اور الیکٹرک بیرئیرز کا استعمال یقینی بنایا گیا ہے۔ مزار  اور بلند عمارتوں پر تعینات سنائپرز اطراف کی نقل و حمل پر کڑی نظر رکھے ہوئے ہیں، مشتبہ افراد، لاوارث سامان، موٹر سائیکلز اور گاڑیوں پر بھی کڑی نظر رکھی جا رہی ہے۔