ویسٹ انڈیز کرکٹ ٹیم کا دورہ پاکستان، پی سی بی نے وینیو تبدیل کرنے پر غور شروع کردیا

ویسٹ انڈیز کرکٹ اگلے ماہ پاکستان کا دورہ کرے گی جس کے لیے پاکستان کرکٹ بورڈ نے پی ٹی آئی کے لانگ مارچ کی وجہ سے پلان بی پر غور شروع کردیا۔

 تفصیلات کے مطابق ویسٹ انڈیز نے راولپنڈی  سٹیڈیم میں تین ون ڈے 8 ، 10 اور 12جون کو کھیلنا ہیں جبکہ تحریک انصاف نے 20مئی کے بعد حکومت کے خلاف مارچ کی کال دینا ہے۔ذرائع کے مطابق ممکنہ طویل دھرنے کے پیش نظر پی سی بی نے ان ہاوس مشاورت کا آغاز کر دیا، جبکہ حکومت سے بھی اس حوالے سے رائے لینے کا فیصلہ کرلیا گیا۔ ذرائع کا یہ بھی کہنا ہے کہ اب تک وینیوز میں کوئی تبدیلی نہیں ، لیکن پی سی بی دوسرے وینیوز کو بھی دیکھ رہا ہے، سیاسی صورتحال کی وجہ سے پی سی بی کو سیریز کا وینیوز تبدیل کرنا پڑ سکتا ہے۔

ذرائع کا یہ بھی کہنا تھا کہ ویسٹ انڈیز کرکٹ بورڈ کا سیریز سے قبل کوئی وفد انتطامات کا جائزہ لینے پاکستان نہیں آئے گا اور وینیو کی تبدیلی کا فیصلہ پی سی بی صورتحال کا جائزہ لے کر حکومتی مشاورت سے کے بعد ہوگا۔واضح رہے کہ پاکستان ویسٹ انڈیز کے خلاف تین ون ڈے میچوں کی سیریز کی میزبانی کرے گا، جو 8 جون سے راولپنڈی میں شروع ہوگی۔