کراچی سے مبینہ اغوا ہونے والی دعا زہرہ کی عمر کے تعین کیلئے بون ٹیسٹ کرنے کا فیصلہ

کراچی سے مبینہ اغوا ہونے والی دعا زہرہ کی جانب سے مرضی سے شادی کرنے کا بیان سامنے آنے کے بعد عمر کے تعین کیلئے بون ٹیسٹ کرنے کا فیصلہ کیا گیا ہے ۔

نجی ٹی وی نیو زکے مطابق دعا زہرہ کی عمر کے تعین کیلئے بون ٹیسٹ کیا جائے گا اور دعا زہرہ کو پنجاب کی عدالت میں بھی پیش  کیا جائے گا ۔پنجاب کی عدالت میں پیشی کے وقت کراچی کا تفتیشی افسر دعا کے ہمراہ ہو گا،دعا کو تحویل میں لینے کیلئے اے وی سی سی ٹیم لاہور روانہ  کر دی گئی ہے۔

یاد رہے کہ گزشتہ روز لاہور پولیس نے آخر کار کراچی کے علاقے گولڈن ٹاون سے لاپتا ہونے والی لڑکی دعا زہرہ کو ڈھونڈ نکالا ، جس کے بعد انکشاف ہوا کہ وہ اپنی مرضی سے لاہور آئی ہے اور اس نے ظہیر نامی نوجوان لڑکے سے نکاح کر لیا ہے۔

لاہور پولیس کی جانب سے بعدازاں دعا زہرہ کا ریکارڈ کیا گیا بیان بھی جاری کیا گیا جس میں انہوں نے زبردستی شادی سے بچنے کیلئے یہ قدم اٹھانے کا دعویٰ کیا اور کہا کہ اس کے گھر والے اس کے کزن زین العابدین کے ساتھ زبردستی نکاح کرنا چاہتے تھے۔