نیشنل ٹی ٹوئنٹی ٹورنامنٹ میں خیبر پختونخوا نے سندھ کو شکست دے دی

نیشنل ٹی ٹوئنٹی کے 25 ویں میچ میں دفاعی چیمپئن خیبرپختونخوا نے سندھ کو 7 وکٹوں سے شکست دے دی۔

سندھ نے پہلے بیٹنگ کرتے ہوئے 152 رنز بنائے۔شان مسعود نے 5 چوکوں اور ایک چھکے کی مدد سے 54 رنز کی اننگز کھیلی جبکہ شرجیل خان 26 رنز بناکر آوٹ ہوئے۔انور علی نے 3 چھکوں کی بدولت 34 رنز کی ناقابل شکست اننگز کھیلی۔ خیبرپختونخوا کی جانب سے افتخار احمد نے 2 جبکہ نیاز خان اور آصف آفریدی نے ایک ایک وکٹ حاصل کی۔153 رنز کے ہدف کے تعاقب میں خیبرپختونخوا کا آغاز بھی زیادہ پراعتماد نہ تھا اور اس کی ابتدائی تین وکٹیں 54 رنز گر چکی تھیں۔ایسے میں افتخار احمد نے 34 گیندوں پر 5 چوکوں اور 3 چھکوں کی بدولت 55 رنز اور صاحبزادہ فرحان 49 رنز بناکر ناقابل شکست رہے۔ افتخار احمد اور صاحبزادہ فرحان کی 100 رنز کی ناقابل شکست شراکت داری نے کے پی کی جیت میں اہم کردار ادا کیا۔ خیبرپختونخوا نے 153 رنز کا ہدف 18 اوورز میں 3 وکٹوں کے نقصان پر حاصل کرلیا۔سندھ کے زاہد محمود اور سہیل خان نے ایک ایک وکٹ حاصل کی۔ افتخار احمد کو شاندار کارکردگی پر پلیئر آف دی میچ قرار دیا گیا۔